Liburu-gomendioa: Hizkuntzaren keinua

Duela hilabete pare bat oso liburu polita erosi nuen, polita eta berezia. "Hizkuntzaren keinua" du izena eta 25 idazle eta 26 ilustratzaileren ekarpenak biltzen ditu. Gaia: Euskaraz bizitzea. Testu laburrak dira, 1000 karakteretara mugatuak, irudi banak lagunduak.
Idazleek nork bere erara ekin diote atazari eta denetariko testu motak erabili dituzte ... ipuinak, olerkiak, oroitzapenak, narrazioak, batzuk barregarriak, asko hunkigarriak, baina denak bukatzen dituzu irribarre bat ezpainetan. Maitasunez eta itxaropenez beterik daudelako, eta euskaraz bizitzeko harrotasunez.